انا الإنسان
كتبهاماهر الشيخ ، في 10 يناير 2008 الساعة: 11:37 ص
أنا الإنسان
ما بقاش مهم الإسم و العنوان*** أصل المهم إنى أنا الإنسان
شايل على كتافى هموم ليها العجب *** زارع في قلبى نبض كله حنان
تلاقينى فى الشارع أنا البياع *** تلا قينى في المرسم أنا الفنان
و أنا الفلاح ساعات الخير مغرقنى *** و كتير فقير عايش على الحرمان
ما أملكش في حياتى غير قيراطين و غير نفسى *** و أقول لنفسى قيراطى يسوى كام فدان
أضحك علي نفسى و أصبرها تصبرنى *** الصبر زادى و آية فى القرآن
******
تلاقينى في الأنواء أنا الملاح *** و شبر ميه يغطينى أموت غرقان
تلاقينى أقتل ناس و أعذب ناس *** تلاقينى في المسجد طالب رضا الرحمن
و ساعات بكون مسجون فى إيد جلاد *** و ساعات أنا الجلاد وأنا السجان
مشلولة رجلى و متكتف أسير بردان *** لكن خيالى حر طير دفيان
أوقات أكون خاضع و مستسلم *** أوقات أكون ثائر ولا البركان
تلا قينى أملا الدنيا بطش و ظلم *** و في لحظة تلاقانى صورة على الجدران
سنين طويلة بأكون عايش و قلبى مريض *** و أموت فى لحظة و عمرى ما كنت يوم عيان
******
و ساعات أنا و وطنى نكون أحباب *** و كثير بكون تايه بلا عنوان
تتغير الأوقات ورا الأوقات *** و تشدنى الغربة عن الأوطان
أخلاقى تخنقنى فى زمن العيب و أنا صابر *** اتركها؟… تتركنى و أنا الخسران
لو حا ترك الأخلاق حا أعيش فى الدنيا متنعم *** لكن حا أعيش فيها كما الحيوان
أنا الإنسان و رب الخلق أكرمنى و كرمنى *** و الخلق تظلمنى و أعيش متهان
أبويا آدم عاش إنسان و مات إنسان *** لكن زمانى أصعب الأزمان
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
يناير 12th, 2008 at 12 يناير 2008 3:44 م
ما أجملها قصيدة… حقيقى
زاخرة وعامرة بصور الانسان فى جميع حالاته… وصراعه بين الضمير والأخلاق من جهة والزمن الصعب من جهة أخرى
وما فيش أروع من الصورة وعكسها .. فى صياغة سلسة جميلة
فى رأيى - لو سمحت لى - هذه من أروع ما كتبت وعبرت
حفظك الله وبالتوفيق دائما
سبتمبر 5th, 2008 at 5 سبتمبر 2008 1:09 ص
الحقيقه احيانا لا نجد ما يعبر عن الجمال القصيده اجمل من ان نجد لها كلاما جميلا نهنئك به رائعه فعلا واكيد الابد انه من كتبها رائع امنياتي لك بالتالق اكتر والابداع المستمر تهانيا القلبيه على روعة وصف تفاصيلنا ودواخلنا ووصف ما عجزنا انفسنا وصف انفسنا به
ربما فعلا لانه لن يستطيع شخص عادي متلنا ان يجد الاسلوب الراقي والتعابير الفنيه البسيطه والمعبره متلما يقال
السهل الممتنع
شكرا
مع احترامي وتقديري صديقه مخلصه نوره